Björgunin við Papey: Fórum út á léttabát frá fiskeldinu
Ingi Ragnarsson formaður björgunarsveitarinnar Báru á Djúpavogi segir að þeir hafi farið á léttabát frá Fiskeldi Austfjarða út að fiskibátnum sem tók niðri við Papey. Þeirra eigin bátur var í viðgerð.„Þegar við komum á staðinn var áhöfnin, fjórir menn, komin yfir í fiskibátinn Véstein sem var fyrsti bátur á staðinn,“ segir Ingi. „Þeir voru samt búnir að ná að blása sinn eigin gúmmíbjörgunarbát upp.“
Ingi segir að kallið hafi komið um níuleytið í gærkvöldi og nær 20 menn úr björgunarsveitinni hafi svarað því.
„Við fórum nú ekki allir á sjó en fyrstu þrír okkar fengu léttabát frá fiskeldinu og við vorum komnir á staðinn skömmu eftir að mennirnir fjórir voru komnir yfir í Véstein,“ segir Ingi. „Þetta gekk því allt eins og best verður á kosið.“
Ingi segir að annar bátur, Sigríður, frá fiskeldinu hafi svo dregið hinn laskaða bát til hafnar á Djúpavogi. Dælt var úr honum á leiðinni.
Komið var með bátinn til hafnar á Djúpavogi um miðnæturleytið. Síðan var fenginn kranabíll til að hífa hann upp á bryggjuna þar sem hann stendur núna.
Mynd: Ingi Ragnarsson.
