Boðað til verkfalls á leikskólanum á Reyðarfirði
Fréttir • This email address is being protected from spambots. You need JavaScript enabled to view it. • Fyrst birt 26. nóv 2024 09:48 • Uppfært 26. nóv 2024 09:48
Félagar í félagi leikskólakennara, sem starfa á leikskólanum Lyngholti á Reyðarfirði, hafa boðað til verkfalls frá og með 10. desember.
Atkvæðagreiðsla fór fram um verkfallsboðunina á fimmtudag og föstudag. Sjö félagar voru á kjörskrá og greiddu þeir allir atkvæði með vinnustöðvuninni. Hún er ótímabundin.
Félög kennara hafa staðið fyrir staðbundnum verkföllum frá því í lok október til að þrýsta á um gerð kjarasamnings. Til þessa hefur ekki komið til verkfalla á Austurlandi, en fyrir helgina samþykktu kennarar í Egilsstaðaskóla verkfall frá 6. – 31. janúar.
Verkföllin eru háð því að ekki hafi verið samið áður en til þeirra kemur. Samninganefndir sveitarfélaga og kennara hafa fundað hjá ríkissáttasemjara síðustu daga. Það gefur vísbendingar um að heldur þokist í samningsátt en engar frekari upplýsingar berast um viðræðurnar vegna fjölmiðlabanns sem sáttasemjari setti á deiluaðila.
