Brottfall nýnema úr austfirskum framhaldsskólum með minnsta móti
Brottfall nýnema úr austfirskum framhaldsskólum árið 2017 var með allra minnsta móti, borið saman við aðra framhaldsskóla á landinu.Þetta kemur fram í svari Lilju Alfreðsdóttur, mennta- og menningarmálaráðherra við fyrirspurn Margrétar Tryggvadóttur á Alþingi um brottfall nema í framhaldsskólum.
Brottfallshlutfall nýnema í Menntaskólanum á Egilsstöðum var 1,5% og 0% í Verkmenntaskóla Austurlands. Hlutfallið í skólunum sveiflast nokkuð milli ára. Þannig var hlutfallið 12,3% í ME árið 2016 en 8,8% í VA. Á tímabilinu sem samantektin nær yfir, 2010-2017, var hlutfallið í ME að jafnaði um 5% en tæp 6% í VA.
Einn annar framhaldsskóli, Menntaskólinn á Laugarvatni, var með ekkert brottfallshlutfall. Í Menntaskólanum á Akureyri, Menntaskólanum við Sund og í Verzlunarskóla Íslands var hlutfallið undir 1%.
Hæst var hlutfallið í Fjölbrautaskólanum í Austur-Skaftafellssýslu, 23,5% árið 2017 en þar voru miklar sveiflur á milli ára. Sé horft yfir lengra tímabili er hlutfallið hæst í Fjölbrautaskólanum í Ármúla, um 20%.
Á landsvísu er hlutfallið 6-7% á þessu tímabili. Það er lægra meðal kvenna en karla.
Í svari ráðherrans er að finna ítarlegri gögn um stöðu íslenskra ungmenna, þótt þær séu ekki sundurliðaðar eftir framhaldsskólum eða landssvæðum. Þannig heldur Hagstofan utan um árgangabrotthvarf sem hefur minnkað á árabilinu 2003-2012, úr 30% í 26%. Hlutfallið var hærra í lok tímabilsins meðal karla, 30% á móti 22% hjá konum.
Snemmbært brotthvarf, þeir sem ljúka ekki framhaldsnámi fyrir 24 ára aldur, lækkaði úr 24,4% árið 2008 í 17,8% árið 2017. Snemmbært brotthvarf meðal karla var 22,% á móti 12,7% hjá konum.
Hlutfall þeirra sem ekki eru í námi, vinnu né starfsþjálfi hefur lækkað úr 6,6% árið 2013 í 4,1% 2017. Hlutfallið er hærra meðal karla þótt munur milli kynja hafi minnkað hratt. Hlutfall þessa hóps er langlægst á Íslandi samanborið við hin Norðurlöndin.
