Brynhildur orðuð við fyrsta sætið hjá Bjartri framtíð: Stefanía skoðar stöðuna

Brynhildur Pétursdóttir, ritstjóri Neytendablaðsins, er samkvæmt heimildum Austurfréttar líkleg til að verða í efsta sæti lista Bjartrar framtíðar í Norðausturkjördæmi í komandi þingkosningar. Stefanía Kristinsdóttir skoðar stöðuna en Elvar Jónsson segist ekki á leið í framboð.

„Já, ég hef verið orðuð við þetta framboð og er alvarlega að hugleiða málið,“ sagði Brynhildur í samtali við Austurfrétt. Samkvæmt heimildum Austurfréttar er líklegt að hún verði í efsta sæti listans. Um það segir Brynhildur enn allt óákveðið.

„Það er ekki enn búið að raða á lista og nefndin sem ákveður uppröðun lista hefur ekki samþykkt neitt ennþá. Þannig að það gæti vel farið svo að ég leiði listann en það er ekki komið alveg á hreint.“

Stefanía G. Kristinsdóttir, framkvæmdastjóri á Egilsstöðum er meðal þeirra sem orðuð hafa verið við framboðið. Hún sagði sig nýverið úr Samfylkingunni en hún var formaður Samfylkingarinnar á Fljótsdalshéraði. „Ég hef engu lofað né verið lofað,“ segir Stefanía.

Elvar Jónsson, kennari og bæjarfulltrúi í Fjarðabyggð sem setið hefur í stjórn Bjartrar framtíðar ætlar ekki að taka þátt í slagnum í vor. „Ég er ekki að fara í framboð.“