Bubbi minnist verbúðar sem verið er að rífa á Eskifirði
Verið er að rífa þekkta verbúð á Eskifirði. Bubbi Morthens dvaldi þar um tíma sem farandverkamaður skömmu áður en hann varð þjóðþekktur fyrir plötu sína Ísbjarnarblús.„Þetta var besti staður í heimi meðan ég bjó þar,“ segir Bubbi Morthens í samtali við Austurfrétt.
Það var Sveinn Guðjónsson verktaki sem vakti athygli á niðurrifi verbúðarinnar á Facebook síðu sinni. Verbúðin var nokkuð komin til ára sinna en hún var byggð árið 1963. Líflegar umræður urðu um helgina á Facebooksíðu Sveins.
Bubbi man eftir matráðskonunni sem eldaði ofan í mannskapinn í verbúðinni. „Bára sá um matinn og hann var æðislega góður,“ segir hann.
Meðal þess sem rætt er um á síðu Sveins er hvort lagið Stál og hnífur hafi verið samið í þessari verbúð. Bubbi segir svo ekki vera. „En ég samdi lagið Hrognin eru að koma í verbúðinni,“ segir hann. Það lag er einmitt að finna á plötunni Ísbjarnarblús.
Sigvaldi H. Ragnarsson segir á síðu Sveins: „Gamla Auðbjörg. Þarna var ég í minni fyrstu launuðu vinnu utan heimilis í síldarsöltun. Bjó á verbúðinni ásamt mörgum snillingum sumum landsfrægum þá og áttu eftir að verða það síðar. Ungur og saklaus sveitadrengurinn undraðist stundum undarlegt hátterni sumra á verbúðinni sem og framandi lyktar úr tóbakspípum, allt öðru vísi en Prins Albert lykt.“
Auðbjörg mun hafa verið nafnið á síldarplaninu fyrir framan verbúðina.
Hvað lífið í verbúðinni varðar segir Bubbi að það hafi verið...“bæði skrautlegt og gott.“
„Man eftir sænskri stelpu sem setti hring í annan nasavænginn á frídögum og menn ætluðu ekki að trúa sínum eigin augum. Þetta varð stórfrétt í bænum,“ segir Baldur Grétarsson og nefnir einnig að...„Halli, síðar bóndi á Út-Héraði, fór á hesti upp tröppurnar á verbúðinni, þurfti að jafna sakir við íbúa þar.“
Mynd: Facebook/Sveinn Guðjónsson.
