Ein besta hótelnýtingin var á Austurlandi í sumar
Austurland var með bestu nýtingu herbergja á hótelum í sumar ásamt Norðurlandi. Hlutfallslega var nýting herbergja á Austurlandi langt yfir meðaltali á landinu í heild.Þetta kemur fram í nýrri úttekt Ferðamálastofu á gistinóttum á hótelum á landinu í júní, júlí og ágúst í ár.
Gistinætur á hótelum voru um hálf milljón talsins sumarið 2020 eða um 36% af skráðum gistinóttum. Þrjár af hverjum fimm gistinóttum voru tilkomnar vegna Íslendinga og voru þær nærri þrefalt fleiri en sumarið 2019.
„Þegar horft er til nýtingar á hótelherbergjum yfir sumarmánuðina má sjá verulegan mun eftir mánuðum og eftir landshlutum,“ segir í úttektinni.
„Hæst var nýtingin á landsvísu í júlímánuði eða 47% en þá fór nýtingin yfir 70% í tveimur landshlutum, Austurlandi og Norðurlandi. Lægst var hún í júní en þá fór hún niður fyrir 15% á höfuðborgarsvæðinu og á Suðurnesjum.“
Þegar skoðaðar eru tölur fyrir hvern mánuð fyrir sig var nýtingin 32% á Austurlandi í júní þegar landsmeðaltalið var 21%. Í júlí fór nýtingin í 73% þegar landsmeðaltalið var 47% og í ágúst var nýtingin 59% á móti 36% á landsvísu í heild.
Þá segir að um 115 þúsund erlendir ferðamenn komu til landsins um Keflavíkurflugvöll sumarið 2020 eða um 79,3% færri en sumarið 2019. Leita þarf allt að tvo áratugi aftur í tímann til að finna hliðstæðan fjölda erlendra ferðamanna á Íslandi að sumri til.
