Ekki mikið á bakvið þessa spaða: Þykjustu Bandidos-liðar á ferð um páskana

Orðrómur um að meðlimir Bandidos hefðu heimsótt Egilsstaði um páskahelgina á ekki við rök að styðjast. Einstaklingar sem sögðust tilheyra vélhjólagenginu gera það ekki. 

„Það kom upp orðrómur um að 3-4 einstaklingar sem gistu í sumarhúsi við Egilsstaði tengdust samtökunum. Einn þeirra lét þess getið í orðræði við veitingamann að þeir væru í Bandidos og ætluðu að opna félagsheimili hér eftir þrjár vikur. Við þekkjum þrjá af þessum mönnum en þeir eru ekki í gengjum sem tengjast afbrotum,“ sagði Óskar Bjartmarz, yfirlögregluþjónn á Egilsstöðum á borgarafundi um skipulagða glæpastarfsemi í gær.

Bandidos eru ekki meðal þeirra vélhjólagengja sem enn hafa haslað sér völl hérlendis en eru mjög stór á alþjóðavísu. Mikið og strangt inntökuferli fylgir því að vilja komast í gengið. Lögreglan á höfuðborgarsvæðinu hefur gefið það út að Egilsstaðir séu næsti áfangastaður vélhjólagengja á Íslandi.

Stefán Bogi Sveinsson, forseti bæjarstjórnar Fljótsdalshéraðs, varaði menn við að hlusta á of um yfirlýsingar manna á borð við þá sem voru á ferðinni um páskana.

„Menn verða að gæta sína að vera ekki of hræddir. Oft er þetta bara loft sem þessir aðilar bera á borð. Manni virðist ekki hafa verið mikið á bakvið þessa spaða sem þarna voru á ferðinni.“