Elvar Jónsson: Öxi er lúxusframkvæmd
Elvar Jónsson, oddviti Fjarðalistans í bæjarstjórn Fjarðabyggðar, lýsir
Axarvegi sem „skemmtilegum valkosti yfir sumarmánuðina.“ Óskynsamlegt sé
þó að setja nýjan heilsársveg þar í forgang í austfirskum vegamálum.
Þetta kemur fram í viðtali við Elvar í nýjasta tölublaði Austurgluggans. „Ég er einfaldlega þeirrar skoðunar að mér finnst óskynsamlegt að fara að eyða skattfé í að byggja upp heilsársveg í þessari hæð. En ég styð það heilshugar að Axarvegi sé viðhaldið og hann jafnvel bættur. Ég tel að hér sé um skemmtilegan valkost að ræða yfir sumarmánuðina og ég nýti mér hann sjálfur á stundum enda falleg leið“.
Hann segir af og frá að leggja nýjan Axarveg og ný Norðfjarðargöng að jöfnu. Göngin séu „neyðarframkvæmd“ til að losa staðinn úr einangrun, efla atvinnusvæðið og greiða aðgengi að stofnunum eins og Verkmenntaskólanum og Fjórðungssjúkrahúsinu. Þannig eigi að setja göng undir Fjarðaheiði frekar næst á listann.
„Heilsársvegur um Öxi er hinsvegar lúxusframkvæmd sem vissulega bætir samgöngur á Austurlandi en engu að síður er ávinningur þess með þeim hætti að sú framkvæmd á ekki að vera forgangsmál og í raun ætti hún að vera aftarlega á lista þeirra samgöngubóta sem þarf að fara í.“
Elvar hefur áhyggjur af því skattfé almennings sé illa varið í nýjan Axarveg. Vegurinn liggi hátt yfir sjávarmáli og nýr vegur verði „jafn ófær, stóran hluta ársins, eins og hann er núna.“
