Enn ráðgert að opna nýjan leikskóla í Fellabæ í næsta mánuði
„Við ráðgerum að opna skólann þann 20. september, taka inn 40 börn í fyrstu atrennu og svo er hugmyndin að bæta við fleiri börnum strax um áramótin,“ segir Jónína Brynjólfsdóttir, forseti sveitarstjórnar Múlaþings.
Óðum styttist í opnun glæsilegs nýs leikskóla í Fellabæ en framkvæmdir við skólann hafa staðið yfir í tæpt ár og þær gengið að óskum. Áætlaður heildarkostnaður við verkið eru tæplega 400 milljónir króna.
Töluverð vinna er enn eftir til að hægt sé að opna á tilsettum tíma en áður var búið að fresta opnuninni um einn mánuð frá upprunalegri áætlun. Rafvirkjar eiga enn eftir að koma fyrir og tengja flest ljós, vegg- og gólfefni vantar að stórum hluta auk þess sem allnokkur jarðvinna er enn eftir fyrir utan nýja skólahúsið svo börnin geti leikið sér vandræðalaust.
Að sögn Jónínu mun byggingarnefnd skólans hittast innan tíðar og fara yfir stöðuna en hún segir engin alvarleg vandræði koma upp ef ekki næst að opna á tilsettum tíma.
„Alls ekki. Við erum auðvitað með starfandi leikskóla á staðnum og ef einhverra hluta vegna verða tafir þá finnum við lausnir á því þegar þar að kemur. Sjálf hef ég bara heyrt að verktakarnir séu bjartsýnir á að þetta gangi allt upp.“
Innandyra í nýjum glæsilegum leikskóla sem risinn er í Fellabæ. Rúmar sex vikur í að skólinn opni formlega en töluvert ógert ennþá.
