Eskfirðingar áhugasamir um Samstöðu
Fréttir • This email address is being protected from spambots. You need JavaScript enabled to view it. • Fyrst birt 04. mar 2012 12:27 • Uppfært 08. jan 2016 19:22
Lilja Mósesdóttir, leiðtogi hins nýja stjórnmálaafls Samstöðu, segir áhuga Austfirðinga á framboðinu koma sér á óvart. Sérstaklega hafi hún orðið var við áhuga frá Eskifirði.
Frá þessu er greint í vikublaðinu Austurglugganum en flokkurinn hélt nýverið opinn fund á Egilsstöðum. Um tuttugu manns mættu á hann.
Lilja sagði við upphaf fundarins að fyrirfram hefði hún talið að framboðið væri veikast á Austurlandi en fljótlega hafi komið í ljós að svo væri ekki. Hún segir að fjölmargir hafi haft samband við sig, einkum frá Eskifirði og kunni hún engar skýringar á því.
Á fundinum kom fram að flokkurinn legði áherslu á að komið yrði á þriðja stjórnsýslustiginu með svæðisþingum þar sem fulltrúar yrðu kosnir sérstaklega á. Með svæðisþingum sem hefði sjálfsákvörðunarrétt í ýmsum málum t.a.m. samgöngumálum yrði valdreifing efld og dregið yrði úr miðsstýringu. Þá yrði tekjum að auðlindum og svæðisbundinni starfsemi látið renna í auknum mæli til samneyslu og uppbyggingar á viðkomandi svæði.
