Fiskeldi veitir tækifæri til að auka útflutningstekjur um 100 milljarða á næstu árum
Jens Garðar Helgason, formaður Samtaka fyrirtækja í sjávarútvegi og framkvæmdastjóri Laxa fiskeldis, segir þörf fyrir Íslendinga að styðja við uppbyggingu í fiskeldi vilji þeir viðhalda lífsgæðum sínum á næstu árum. Þess vegna sér varhugavert að leggja strax auðlindagjald á greinina.Þetta kom fram í ræðu Jens Garðars á ársfundi Samtaka fyrirtækja í sjávarútvegi á föstudag.
Jens Garðar vísaði þar til umræðu um að útflutningstekjur Íslendinga þyrftu að aukast um 1000 milljarða, eða eina billjón króna, á næstu 20 árum til að þjóðin viðhaldi þeim lífsgæðum sem hún hefur í dag.
Jens Garðar benti á að með uppbyggingu fiskeldis væri hægt að auka útflutningsverðmæti um 100 milljarða á næstu árum, jafnmikið og verðmæti þorsks er í dag.
Hann sagði fiskeldið viðbót við íslenskan sjávarútveg sem ekki hefði beðið um sérstakar fyrirgreiðslur af hálfu stjórnvalda. Um væri að ræða framsækinn þekkingariðnað sem efldi byggðafestu á viðkvæmum svæðum og nýtt auðlindir sem ekki væru nýttar í dag.
Jens lýsti hins vegar vonbrigðum með að í drögum að lögum um fiskeldi sé gert ráð fyrir auðlindagjaldi af sjókvíaeldi. Of snemmt sé að fara fram með slíkar tillögur á sama tíma og greinin sé rétt að fara af stað og ekkert eldisfyrirtækjanna farið að skila hagnaði.
Jens notaði reyndar tækifærið til að gagnrýna einnig auðlindagjöld á hefðbundinn sjávarútveg. Hann sagði hækkandi rekstrarkostnað, meðal annars með skattheimtu, vera farinn að grafa undan samkeppnisstöðu íslensks sjávarútvegs á heimsmarkaði.
Jafnframt hvatti hann stjórnvöld til að einfalda regluverk um sjávarútveg og efla hafrannsóknir. Jens Garðar kom einnig inn á umhverfismál þar sem hann kom inn á markmið um að kolefnisjafna íslenskan sjávarútveg.
Jens Garðar var í lok fundar endurkjörinn formaður samtakanna. Frá fyrirtækjum með aðalstarfsemi á Austurlandi sitja einnig í stjórninni Gunnþór Ingvason frá Síldarvinnslunni og Guðmundur Gíslason frá Fiskeldi Austfjarða.
