Fiskmjölsverksmiðjur keyra á olíu fram á vor
„Þetta eru slæm tíðindi og þýðir að við þurfum að keyra á okkar varaafli fram á vor sem er olía með mikilli aukningu á losun frá starfseminni,“ segir Gunnþór Ingvason forstjóri Síldarvinnslunnar.Landsvirkjun hefur tilkynnt að orkuskerðingar til fiskmjölsverksmiðja munu verða fram á vor vegna þess að staðan í vatnsbúskap Landsvirkjunar hefur ekki verið verri í sjö ár. Langvarandi þurrkar hafa skapað þetta vandamál.
„Í desember var framboð af raforku til fiskmjölsverksmiðja takmarkað og nú er ljóst að ekki er til raforka inn á þennan markað fram á vor,“ segir í tilkynningu Landsvirkjunnar.
Aðspurður um hvort þetta hafi komið sér á óvart segir Gunnþór svo ekki vera. „Nei þetta er í raun ekki lengra tímabil en við áttum orðið von á eftir að hafa farið yfir stöðu mála með orkuseljendum og Landsvirkjun,“ segir hann.
Heimsmarkaðsverð á tunnu af hráolíu er um 81 dollar. Verðið hækkaði töluvert fram að síðustu áramótum en hefur haldist nokkuð stöðugt í kringum 80 dollara undanfarnar tvær vikur. Ekki eru líkur á að það breytist í bráð. Til samanburðar má nefna að fyrir COVID, eða í ársbyrjun 2020 var verðið undir 30 dollurum á tunnuna.