Fjarðabyggð: Meirihlutinn fallinn í fyrstu tölum
Meirihluti Framsóknarflokks og Sjálfstæðisflokks, sem verið hefur í Fjarðabyggð frá 2010, er fallinn samkvæmt fyrstu tölum úr sveitarfélaginu.Flokkarnir fengu þrjá menn hvor í síðustu kosningum en missa hvor um sig einn mann. Miðflokkurinn, sem er nýr, fær einn mann. Fjarðalistinn bætir við sig fylgi og manni, fer úr þremur fulltrúum í fjóra.
Talin hafa verið 719 atkvæði. 3.463 voru á kjörskrá. Ekki hefur verið staðfest hve mörg atkvæði voru greidd alls í dag.
Framsóknarflokkur: 192 atkvæði, 26,7% og 2 fulltrúar.
Sjálfstæðisflokkur: 155 atkvæði, 21,6% og 2 fulltrúar.
Miðflokkurinn 100 atkvæði, 13,9% og 1 fulltrúi.
Fjarðalistinn 272 atkvæði, 37,8% og 4 fulltrúar.
Næsti fulltrúi inn er þriðji fulltrúi Framsóknarflokks sem vantar 12 atkvæði til að fella út fjórða mann Fjarðalista.
Sjálfstæðisflokkurinn fékk 37,35% í síðustu kosningum og tapar tæpum 16 prósentustigum eða yfir 40% af fylgi sínu. Framsóknarflokkurinn fékk 29,8% síðast og tapar því rúmum þremur prósentustigum. Fjarðalistinn bætir við sig fimm prósentustigum og Miðflokkurinn kemur nýr inn.
Í fyrstu útgáfu fréttarinnar misritaðist að Fjarðalistinn væri með þrjá fulltrúa.
