Fjarðalistinn ræðir aftur við alla
Ekki hefur verið tekin ákvörðun um formlegar meirihlutaviðræður í Fjarðabyggð. Fjarðalistinn, sem er í lykilstöðu eftir kosningarnar á laugardag með fjóra bæjarfulltrúa, metur vænlega samstarfsaðila aftur í dag.„Við höfum talað við alla og munum gera það aftur í dag. Við gáfum það út að við gengjum óbundin til kosninga,“ segir Eydís Ásbjörnsdóttir, oddviti Fjarðalistans.
Meirihluti Framsóknarflokks og Sjálfstæðisflokks, sem ríkt hefur frá 2010, féll í kosningunum þar sem báðir flokkar fóru úr þremur bæjarfulltrúum í tvo. Að auki hefur Miðflokkurinn einn fulltrúa sem þýðir að Fjarðalistinn getur myndað tveggja lista meirihluta með hverjum og einum hinna þriggja.
Fulltrúar Fjarðalistans hittust í gærkvöldi eftir að hafa rætt við fulltrúa hinna framboðanna þriggja og staðan verður tekin aftur í kvöld áður en ákvörðun verður tekin um óformlegar viðræður. „Við ætlum að vanda til verka.“
Fjarðalistinn bætti við sig tveggja prósentustiga fylgi og einum fulltrúa í kosningunum um helgina. „Ég er mjög þakklát fyrir stuðninginn. Það er greinilegt að fólk vill sjá breytingar og treystir okkur til að fara í þær,“ segir Eydís.
Spennan var mikil á laugardagskvöld. Fjórði maður Fjarðalistans, Einar Már Sigurðarson, var inni í fyrstu tölum, úti í öðrum tölum en inni í lokatölum á einu atkvæði. Næstur inn var þriðji maður Sjálfstæðisflokksins, Ragnar Sigurðsson og fór flokkurinn fram á endurtalningu á sunnudag. Í henni voru úrslitin staðfest.
„Það ríkti mikil gleði hjá okkur þegar lokatölur lágu fyrir á laugardagskvöld. Spennustigið var hins vegar hátt fram yfir endurtalningu.“
