Fljótsdalshérað: Starfsmenn leikskólanna vilja fresta sameiningu
Starfsmenn leikskólanna Skógarlands og Tjarnarlands vilja að ákvörðun bæjaryfirvalda á Fljótsdalshéraði um að sameina leikskólana verði endurskoðuð. Bæjarstjórnin hafnar því og telur ýmsan ávinning felast í sameiningunni.
„Það er skoðun okkar að of skammur tími sé til stefnu til að sameiginlegt starf geti farið farsællega af staðs strax eftir sumarfrí“ segir í ályktun starfsmanna sem lögð var fram á kynningarfundi um sameiningu leikskólanna fyrir skemmstu.
Undir ritar á fimmta tug starfsmanna leiksólans nafn sitt og skorará bæjaryfirvöld að endurskoða ákvörðunina. „Vinna þarf að svo viðamiklum breytingum á breiðari grunni en gert hefur verið, þ.e. í sátt og samvinnu við skólasamfélagið.“ Þá hafa trúnaðarmenn á leikskólunum óskað eftir sundurliðun á útreikningi á áætluðum fjárhagslegum ávinningi af sameiningu leikskólanna.
Bæði faglegur og fjárhagslegur ávinningur
Ekki er þó útlit fyrir að hætt verði við ferlið. Í svari bæjarstjórnar við áskoruninni segir að ákvörðunin hafi verið tekin í nóvember og að baki henni liggi bæði fagleg og fjárhagsleg rök.
„Bæjarstjórn telur hinn faglega ávinning felast m.a. í heildstæðari stefnu í starfi með börnum frá 1 árs upp í 5 ára, betra flæði reynslu, þekkingar og búnaðar milli starfstöðva og að auðveldara verði að bregðast við sveiflum í árgangastærðum. Fjárhagslegur ávinningur verði minni stjórnunarkostnaður sem nemur að lágmarki kr. 5.000.000.- árlega auk þess sem reikna má með sparnaði í innkaupum og öðrum þáttum.“
Haldið áfram
Viðurkennt er að breytingar sem þessar leiði alltaf til óvissu en með „markvissri vinnu sé nægur tími til stefnu til að takast á við þær áskoranir sem fyrir liggja við verkefnið.“
Leikskólastjórum hefur verið falið að segja upp aðstoðarleikskóla- og deildarstjórum upp störfum með starfslokum 31. júlí. Fjölgað hefur verið í samstarfshópi um sameininguna með einum fulltrúa frá hvorum skóla. Í honum eiga að auki fulltrúar úr fræðslunefnd, af fræðslusviði og úr skólasamfélaginu.
