Flutningabíll með spilliefni í vandræðum á Jökuldal
Slökkvilið Fljótsdalshéraðs ásamt fleiri viðbragðsaðilum var kallað út um hádegisbilið eftir að vörubíll með spilliefnum lenti í vandræðum neðan við bæinn Hjarðargrund á Jökuldal.
Samkvæmt upplýsingum frá lögreglu virðist sem vegkantur hafi gefið sig þannig að bíllinn fór út af og tankur sem hann var með í eftirdragi valt.
Ráðstafanir voru gerðar vegna spilliefna í tankinum til að tryggja vettvanginn. Búast má við einhverjum umferðartöfum vegna vinnu á staðnum fram eftir degi.
Helstu útköll lögreglu það sem af er viku hafa tengst snjókomu og ófærð. Ferðalöngum á Öxi og Fjarðarheiði var fylgt til byggða í gær.