Fyrst á dagskránni að kynnast samfélaginu
Þór Steinarsson, nýr sveitarstjóri á Vopnafirði, hóf störf hjá sveitarfélaginu í dag. Hann hlakkar til að kynnast staðnum og fólkinu sem þar býr og líst vel á sig í nýju umhverfi.„Mér líst vel á þetta verkefni. Það er öflugt fólk í sveitarstjórninni, fjárhagsstaða sveitarfélagsins er góð, samfélagið er kraftmikið og það er spennandi að fá að taka þátt í að byggja það upp og efla,“ segir Þór.
Segja má að tilkoma hans hafi borið brátt að, ráðningin var staðfest á sveitarstjórnarfundi í hádeginu á föstudag og tók Þór við störfum í dag. Hann er stjórnsýslufræðingur að mennt og hefur undanfarin sex ár starfað sem aðstoðarmaður sviðsstjóra á umhverfis- og skipulagssviði Reykjavíkurborgar.
„Það var gefið í skyn að það væri gott ef ég gæti hafið störf sem fyrst þannig ég gekk frá því á mínum gamla vinnustað að það væri hægt. Hér eru fjölmörg verkefni sem bíða úrlausnar.“
Þór viðurkennir að hann þekki lítið til á Vopnafirði. Afi hans og amma bjuggu hins vegar í Þistilfirði og þar var hann í sveit á sumrin.
„Fyrst á dagskránni er að kynnast samfélaginu og þessum stóra vinnustað, fá yfirsýn yfir helstu verkefni og stöðuna. Síðan fer fjárhagsáætlunarvinna fljótlega í gang. Utan þess eru erindi frá fólki sem bíður að þeirra málum verði sinnt og ég hvet þá sem eiga erindi við okkur að vera óhrædda að leita til mín.“
