Fyrsti makrílfarmur vertíðarinnar kominn til Vopnafjarðar
Venus NS kom með fyrsta makrílfarminn sem berst til Austfjarða á þessari vertíð til Vopnafjarðar í gærkvöldi.„Fiskurinn er fínn, við erum bæði að flaka og heilfrysta,“ segir Magnús Róbertsson, framleiðslustjóri HB Granda á Vonafirði.
Venus fór til veiða á sunnudag og kom á tíunda tímanum í gærkvöldi til Vopnafjarðar með rúmlega 300 tonn. Stefnt er að því að klára að landa úr skipinu í nótt og fer það þá fljótt aftur til veiða.
Vinnsla hófst strax á makrílnum í nótt og hefur gengið vel að sögn Magnúsar.
Annað skip HB Granda, Víkingur AK, er á veiðum á miðunum suður af Vestmannaeyjum. Þar er einnig skip Loðnuvinnslunnar, Hoffell og þangað stefnir Aðalsteinn Jónsson sem hélt úr heimahöfn á Eskifirði klukkan tíu í morgun.
