Guðni Th. vinsælastur meðal Austfirðinga
Yfir 80% kjósenda á Austurlandi velja Guðna Th. Jóhannesson sem næsta forseta. Austfirðingar virðast einnig óánægðari en flestir aðrir með ákvörðun Ólafs Ragnars Grímssonar með að bjóða sig ekki fram aftur.
Þetta kemur fram í skoðanakönnun sem Maskína gerði í vikunni en niðurstöður hennar voru birtar í gær.
Þar kemur fram að Guðni Th. njóti stuðnings 83,4% kjósenda á Austurlandi sem er hans langmesta fylgi þar sem á landsvísu mælist hann með 67,2%. Davíð Oddsson fær 13,9% sem er svipað og hann fær á landsvísu og aðrir frambjóðendur eru með 2,7%.
Andri Snær Magnason og Halla Tómasdóttir mælast ekki á svæðinu en reynast hins vegar vinsæl þegar spurt er hvern kjósendur vildu helst velja á eftir sem þeir völdu í fyrri spurningu.
Þá fer Andri í 40%, Halla í 28%, Guðni í 17%, Sturla Jónsson í 3,7% og Davíð í 3,1%, sem er hans langversta útkoma í spurningunni.
Marktækur munur er í greiningu Maskínu á milli búsetusvæði. Úrtakið á Austfjörðum er hins vegar mjög lítið, aðeins 25 svarendur af ríflega 840 á landsvísu.
69,4% Austfirðinga eru ánægðir með ákvörðun Ólafs Ragnars Grímssonar um að bjóða sig ekki fram aftur en 21,4% óánægð. Austfirðingar eru því almennt ósáttari en aðrir landsmenn við ákvörðun fráfarandi forseta. Ekki er þó talin marktækur munur á milli búsetusvæða í svörum við spurningunni.
