Gul viðvörun komin á kjördag
Veðurstofan hefur gefið út gula viðvörun sem gildir nánast allan þann tíma sem kjörstaðir vegna Alþingiskosninganna eiga að vera opnir á laugardag.Viðvörunin gildir fyrir Austfirði frá klukkan 20:00 á morgun, föstudag fram til 21:00 á laugardag. Kjörstaðir eru almennt auglýstir opnir frá 9:00-22:00 á laugardag.
Á þessum tíma er von á norðaustan 15-20 m/s með talsverði snjókomu um tíma, skafrenningi, lélegu skyggni og versnandi akstursskilyrðum. Lokanir á vegum eru líklegar sem og afmarkaðar truflanir á samgöngum.
Veðurstofan hefur einnig gefið út sambærilega viðvörun fyrir Suðausturland. Hún tekur hins vegar gildi síðdegis á morgun en fellur úr gildi á laugardagsmorgun.
Engin viðvörun hefur enn verið gefin út fyrir Austurland að Glettingi, eða önnur spásvæði innan Norðausturkjördæmis.
