Handstýrður flutningur á störfum úr Fjarðabyggð
Bæjarráð Fjarðabyggðar lýsir þungum áhyggjum af áhrifum fyrirhugaðra breytinga á reglum um stjórn fiskveiða á atvinnulíf í sveitarfélaginu. Í raun sé verið að handflytja störf og fjármuni af svæðinu.
Þetta kemur fram í umsögn bæjarráðsins til Alþingis um frumvarpið og skýrslu sem KPMG vann fyrir sveitarfélagið um væntanleg áhrif breytinganna á samfélagið.
Reiknað er með að kvótaskerðingin í Fjarabyggð verði tæp 13.000 tonn. Það samsvarar 1.700 þorskígildistonnum eða 4,5% af kvóta. Mest er skerðingin í loðnu, rúm 8.000 tonn en á annað þúsund í kolmunna og norsk-íslensku síldinni.
Til að halda óbreyttum veiðiheimildum þyrftu útgerðir í Fjarðabyggð að greiða rúman hálfan milljarð króna fyrir leigukvóta. Þá er óvíst að þau geti leigt til sín kvótann. Reiknað er með að útsvarstekjur skerðist um 40-80 milljónir króna og þykir sýnt að tekjur af leigukvóta vegi ekki upp á móti því.
„Ekki er tekið tillit til þess sem gæti orðið ef fyrirtækin þurfa að hagræða enn frekar í mannahaldi, fækka skipum og framkvæma fleiri hagræðingaraðgerðir sem skerða munu útsvar sveitarfélagsins og tekjur hafnarsjóðs,“ segir í umsögninni.
Bæjarráðið varar við „umtalsverðum, neikvæðum“ afleiðingum fyrir atvinnulífið í Fjarðabyggð verði frumvarpið samþykkt óberytt. Fyrir liggi að einu skipi verði lagt og milli 20 og 40 störf tapist á sjó og landi.
„Bæjarráð Fjarðabyggðar hafnar því að aflaheimildir verði fluttar úr sveitarfélaginu með opinberri íhlutun til úthlutunar eftir pólitískum leið um allt land. Slíkt er í raun handstýrður flutningur á störfum úr Fjarðabyggð.“
Bent er á að veiðigjald stærstu útgerðanna í Fjarðabyggð fari úr rúmum 300 milljónum í 3,4 milljarða króna. „Skattheimta á þeim mælikvarða sem boðuð er í frumvörpunum er gríðarleg færsla á fjármunum frá samfélaginu hér á Austfjörðum í ríkissjóð“
Kallað er eftir víðtæku samstarfi hagsmunaðila um breytingar á fiskveiðistjórnunarkerfinu og meðal annars vísað á tillögu „sáttanefndarinnar“ svokölluðu þar sem náðist sátt um breytingar sem hægt væri að gera.
