Hátíðin Franskir dagar á Fáskrúðsfirði færist til á dagatalinu
Stjórn einnar þekktustu hátíðar Austurlands, Franskra daga á Fáskrúðsfirði, hafa tekið þá ákvörðun að færa hana fram um eina viku eftirleiðis.
Hátíðin, hvers meginhlutverk er að halda á lofti merkri sögu franskra sjómanna á Íslandsmiðum frá fyrri tíð og þá sérstaklega sterkri tengingu við Fáskrúðsfjörð, hefur frá upphafi verið haldin viku fyrir Verslunarmannahelgina ár hvert frá 1996.
Það breytist á næsta ári því Franskir dagar 2025 og eftirleiðis munu fara fram tveimur vikum fyrir Verslunarmannahelgina. Nánar tiltekið 17. til 20. júlí næstkomandi.
Í umsögn stjórnar vegna þessara breytinga kemur fram að í kjölfar hátíðarinnar síðasta sumar hafi meginumræðuefnið verið hvort færa ætti hátíðina til en aðsókn hefur dregist nokkuð saman hin síðari ár og fleiri en færri voru á þeirri skoðun að önnur dagsetning gæti breytt því til betri vegar. Þannig yrðu Franskir dagar í minni samkeppni við þá fjölmörgu aðra viðburði sem gjarnan fara fram vikuna fyrir Verslunarmannahelgina.
