HAUST hótar Olís dagsektum
Heilbrigðiseftirlit Austurlands (HAUST) hefur gefið Olíuverzlun Íslands frest til 15. desember til að ljúka úrbótum við stöð olíufélagsins í Fellabæ. Eftirlitið hefur ítrekað þrýst á félagið um að koma málum þar í lag.Heilbrigðisnefnd Austurlands, sem er um leið stjórn HAUST, samþykkti á síðasta fundi sínum að leggja 10.000 króna dagsektir á félagið frá og með 15. desember verði ekki búið að gera þær úrbætur á stöðinni sem eftirlitið hefur ítrekað farið fram á.
Á fundinum var tekið fyrir erindi frá Olís þar sem tilkynnt var að framkvæmdir við fylliplan myndi dragast enn frekar, meðal annars vegna tafa á afhendingu tanka frá erlendum birgjum. Erindi félagsins er dagsett 9. október en HAUST hafði fyrr á árinu veitt Olís frest til loka september til að ljúka framkvæmdum.
Þetta er ekki í fyrsta sinn sem áætlanir Olís um úrbætur við stöðina í Fellabæ tefjast. Á fundi Heilbrigðisnefndarinnar í febrúar var félaginu veitt áminning og frestur til 1. maí til að ljúka framkvæmdum.
Á fundi nefndarinnar í maí var tekið fyrir erindi frá félaginu þar sem heitið var að úrbótum fyrir lok september. Þá bókaði nefndin undrun sína á seinaganginum og benti á að stöðin þyrfti að uppfylla kröfur sem til hennar væru gerðar til að starfsleyfi hennar yrði endurnýjað en það rennur út á næsta ári.
En þar með er ekki öll forsaga málsins sögð. Í fundargerðum Heilbrigðisnefndar kemur fram að úrbótaáætlun Olís fyrir stöðina í Fellabæ hafi upphaflega verið samþykkt í febrúar árið 2016. Þá átti áfyllingarplanið að vera tilbúið í maí sama ár.
Á þeim tíma sem síðan er liðinn hefur nokkrum sinnum verið farið í eftirlitsferðir að stöðinni og gerðar athugasemdir við að ekki hefði verið staðið við fyrirheitin. Til að fylgja því eftir samþykkti heilbrigðisnefnd í lok maí 2017 lokafrest til úrbóta til loka desember sama ár.
Síðan hefur verið haldið áfram að knýja á fyrirtækið um úrbætur, án þess að þær hafi gengið eftir. Í bókun nefndarinnar frá í febrúar síðastliðnum er Olíuverzlunin átalin harðlega vegna endurtekinna vanefnda á úrbótaáætlunum. Undrun er lýst á seinaganginum og afskipta- og metnaðarleysi fyrirtækisins í mengunarmálum harmað.
