Hreindýraveiðum lokið: Þrettán dýr óveidd
Fréttir • This email address is being protected from spambots. You need JavaScript enabled to view it. • Fyrst birt 23. sep 2012 11:45 • Uppfært 08. jan 2016 19:23
Þrettán dýr vantaði upp á að allur hreindýraveiðikvóti ársins væri veiddur. Ekki tókst að endurúthluta öllum leyfum sem skilað var á tímabilinu. Nýjar kröfur um skotpróf virtust þvælast fyrir veiðimönnum.
Veiðitímabilinu lauk á fimmtudag. Alls veiddust 996, 582 kýr og 414 tarfar en heimilt var að veiða 1009 dýr. Upp á að allur kvótinn næðist vantaði sjö tarfa og sex kýr.
Í frétt á vef Umhverfisstofnunar segir að mörgum úthlutuðum leyfum hafi verið skilað fyrir tímabilið. Kröfur voru gerðar um að allir veiðimenn hefðu tekið skotpróf en það gerðu ekki allir.
„Þetta olli því að mörgum leyfum þurfti að úthluta aftur og ekki tókst að endurúthluta öllum leyfunum þó haft væri samband við fjölmarga umsækjendur á biðlistum.“
Veiðin mun hafa gengið vel en „þó þurfti að grípa til þess í meira mæli en áður að opna skörun milli samliggjandi veiðisvæða þar sem dreifing dýranna var að nokkru leyti óhefðbundin.
Áberandi er hve margir veiðimenn koma til veiða um helgar þannig að þá eru margir veiðihópar á ferðinni á fáum dögum en aðrir dagar eru illa nýttir. Fyrri hluta tímabilsins var veður gott en veðrið var ekki eins hagstætt á seinni hluta veiðitímans og tafði það veiðar eitthvað.“
