Hvorki meiri líkur né minni á formlegum viðræðum
Útlit er fyrir að það ráðist síðar í dag hvort af formlegum viðræðum verði milli Sjálfstæðisflokks og Héraðslista um myndun meirihluta í bæjarstjórn Fljótsdalshéraðs. Fráveitumál hafa reynst erfið í óformlegum viðræðum.
„Það er hvorki meiri líkur né minni á að við förum í formlegar viðræður,“ segir Anna Alexandersdóttir, oddviti Sjálfstæðisflokksins.
Héraðslisti og Sjálfstæðisflokkur hafa undanfarin fjögur ár starfað saman í meirihluta með Á-lista. Á-listinn bauð ekki fram aftur en tilfærsla fylgis í kosningunum á laugardag varð með þeim hætti að framboðin tvö eru með sama fulltrúafjöldi og fyrri meirihluti. Þau hafa síðan kannað grundvöll fyrir áfram haldandi samstarfi.
Ólíkar lausnir í fráveitumálum þéttbýlisins á Héraði var eitt stærsta kosningamálefnið í vor og þar greindi Héraðslista og Sjálfstæðisflokk á. RÚV hafði eftir Steinari Inga Þorseinssyni, oddvita Héraðslistans, að hann teldi meiri líkur en minni að lending náist í fráveitumálunum í dag og samhljómur sé um önnur mál.
Í samtali við Austurfrétt sagði Anna að ekki hefðu enn verið rædd önnur mál en fráveitan í samræðum framboðanna tveggja, en í öðrum málaflokkum sé sannarlega samhljómur. Líklega muni skýrast síðar í dag, eða kvöld, hvert framhald viðræðnanna verði.
Framboðin hafa bæði þrjá fulltrúa og geta því hvort um sig myndað meirihluta með Framsóknarflokknum sem kom tveimur bæjarfulltrúum að.