Íbúaþing á Vopnafirði; Fyrir eflingu samfélags og byggðar
Íbúaþing verður haldið í félagsheimilinu Miklagarði á Vopnafirði helgina 23.-24. apríl næstkomandi, en að því standa Vopnafjarðarhreppur, Byggðastofnun og Austurbrú, í samstarfi við íbúa.
Þingið markar upphaf að þróunarverkefni sem standa mun í eitt ár og Vopnafjarðarhreppur fylgir eftir ásamt samstarfsaðilunum. Umsjón með þinginu er í höndum Sigurborgar Kr. Hannesdóttur, hjá ILDI þjónustu og ráðgjöf.
Ekki er fyrirfram mótuð dagskrá, heldur stinga þátttakendur upp á umræðuefnum. Þannig verður allt til umræðu, sem íbúar vilja ræða, varðandi umhverfi, atvinnulíf, samfélag og hvaðeina sem skiptir fólk máli.
Þingið hefst klukkan 11:00 á laugardagsmorgun og stendur til klukkan 16:00. Á sunnudaginn verður unnið frá 11:00 til 15:00 og þá verður góðu verki fagnað og Vopnafjarðarhreppur býður upp á eitthvað sérstaklega gott með kaffinu.
Vopnfirðingar eru hvattir til að mæta og taka þátt í að efla samfélag og byggð á Vopnafirði enn frekar.
