Íbúðarhús í Neskaupstað illa farið eftir eldvoða í morgun
Mikið tjón varð í eldi sem kom upp í húsinu að Miðstræti 6, einnig þekkt sem Bár, á sjötta tímanum í morgun. Einn einstaklingur var heima þegar eldurinn komst út. Sá komst út af sjálfsdáðum.Bár er tveggja hæða hús með kjallara. Búið var á neðri hæðinni en atvinnustarfsemi á þeirri efri. Húsráðandi var einn í húsinu. Sá varð var við eldinn og komst út sjálfur, að því er virðist ómeiddur.
Slökkviliðsmenn í Neskaupstað voru fyrstir á vettvang en barst fljótlega aðstoð frá kollegum sínum úr Fjarðabyggð.
„Það var mikill eldur á fyrstu hæðinni og þaðan fór töluverður reykur inn á efri hæðina. Við sendum slökkviliðsmenn inn á efri hæðina þegar nánast var búið að slökkva á fyrstu hæðinni. Hitamyndavélar sýndu þó mikinn hita í öllu gólfinu.
Við vorum enn að vinna í eldhreiðrum á neðri hæðinni og vissum að það gætu hlaupið upp úr þeim. Við vonuðumst til að það gerðist ekki en það gekk ekki eftir þannig að það blossaði upp eldur á efri hæðinni.
Okkur gekk samt greiðlega að slökkva hann. Þar kom 1-7 slökkvikerfi sérstaklega vel út og skilaði sér hraðar en vatnið sem við notuðum í byrjun,” segir Júlíus Albertsson, slökkviliðsstjóri í Fjarðabyggð.
Hann segir slökkvistarfið almennt hafa gengið vel og því lokið þegar svæðið var afhent lögreglu um klukkan tíu í morgun. Báðar hæðir hússins eru þó illa farnar af eldi, vatni og reyk. Eldsupptök eru ókunn en rannsókn þeirra verður í höndum lögreglu.
Húsið mun vera byggt árið 1913. Hluti þess hafði nýlega verið endurgerður. Í samantekt Veðurstofunnar um hús í Neskaupstað segir að á Fransmannatímanum hafi verið vandamál af drukknum útlendingum sem streymdu í húsið á kvöldin. Nafnið, Bár, stóð utan á því og gerðu aðkomumennirnir ekki greinarmun á því og hinu alþjóðlega orði „Bar“.
