Innan við 1% fjár Tækniþróunarsjóðs til Austurlands
Minna en 1% þess fjár sem stærsti einn stærsti nýsköpunarsjóður landsins, Tækniþróunarsjóður, úthlutar á hverju ári rennur til Austurlands. Austfirðingar virðast sækja minna fé til nýsköpunar en aðrir.Þetta kemur fram í nýlegu svari Þordísar Kolbrúnar Reykfjörð Gylfadóttur, ferðamála-, iðnaðar- og nýsköpunarráðherra við fyrirspurn frá Albertínu Friðbjörgu Elíasdóttur, þingmanni Samfylkingarinnar í Norðausturkjördæmi, um stuðning við nýsköpun eftir landshlutum.
Tækniþróunarsjóði er ætlað að styðja þróunarstarf og rannsóknir á sviði tækniþróunar sem miða að nýsköpun í íslensku atvinnulífi. Á tímabilinu 2009-2018 voru greiddar úr honum 13,5 milljarðar króna til alls 730 verkefna.
Af þeim fóru 85 milljónir króna, eða 0,6% til Austurlands, sem er langlægsta upphæð einstaks landshluta. Það fer reyndar saman við að Austfirðingar áttu langfæstar umsóknir í sjóðinn en hlutfall þeirra sem fengu styrki var svipað og í öðrum landshlutum. Langmest styrkjanna, 90%, fór á höfuðborgarsvæðið.
Í svarinu er einnig að finna fjölda umsókna og úthlutanir um endurgreiðslur vegna rannsóknar og þróunarkostnaðar nýsköpunarfyrirtækja en lög sem heimiluðu slíkar endurgreiðslur voru samþykkt árið 2010.
Á tímabilinu frá 2011-2018, eða öllu heldur 2014-18 þar sem engin umsókn barst frá Austurlandi fyrstu þrjú árin, komu 11 umsóknir úr fjórðungnum um endurgreiðslur. Aðeins einni var hafnað.
Aftur kom langlægsta upphæðin austur 36,7 milljónir eða 0,2%. Heildarendurgreiðslur námu rúmum 16 milljörðum króna.
Tækniþróunarsjóður stendur í dag fyrir kynningarfundi þar sem bæði verður farið yfir styrkjaúthlutanir hans, sem og skattaafslátt vegna rannsókna- og þróunarverkefna en næstu umsóknarfrestur í sjóðinn er 17. febrúar. Kynningarfundurinn hefst klukkan 12:00 í húsnæði Austurbrúar á Egilsstöðum.
