Íslandspóstur opnar á nýjum stað á Egilsstöðum
Íslandspóstur opnaði í gær nýja afgreiðslu sína á Egilsstöðum. Pósturinn er nú kominn í Kaupvang 6 þar sem áður var byggingavörudeild Kaupfélags Héraðsbúa. Svæðisstjórinn segir gamla húsið ekki hafa hentað starfseminni lengur.„Okkur líst mjög vel á þetta húsnæði. Þetta er flott staðsetning, þess vegna erum við hér,“ segir Árni Kristinsson, svæðisstjóri Íslandspósts á Austurlandi.
Frá árinu 1972 hefur afgreiðslan verið að Fagradalsbraut 9 en Árni segir að þörf hafi verið á nýju húsnæði í takt við breytta tíma.
„Þá var komið með 10-15 póstpoka í kerru aftan í einhverum bíl. Í dag kemur pósturinn í Egilsstaði í risagrindum.
Hér er betra aðgengi fyrir bæði okkur og viðskiptavini. Við erum ekki lengur með stóru bílana á sama plani og viðskiptavinina okkar. Þá var það þannig á mesta annatímanum að maður þurfti að fara út um vöruafgreiðsluna og inn um aðalinnganginn ef maður ætlaði að tala við einhvern í hinum endanum.
Þetta hús er reyndar minna en hér nýtist hver einasti fermetri.“
Hjá Íslandspósti starfa ellefu starfsmenn í misháu starfshlutfalli auk fjögurra landpósta.
Árni, annar frá hægri, ásamt hluta starfsfólks Íslandspósts á Egilsstöðum í nýja húsnæðinu.
