Kennarar VA þrýsta á um að kennarar hljóti laun á við almennan vinnumarkað
Kennarafélag Verkmenntaskóla Austurlands telur að íslenska ríkið hafi ekki staðið við kjarasamninga frá 2016 um að jafna laun og lífeyrisréttindi milli opinberra starfsmanna og almenns vinnumakaðar.Þetta kemur fram í ályktun frá aðalfundi félagsins sem haldinn var í byrjun vikunnar. Þar segir að lífeyrisréttindi á almennum markaði hafi strax eftir samningana verið jöfnuð á við það sem gerist meðal opinberra starfsmanna og lífeyrisréttindi kennara síðan skert.
Á móti sé loforðið um jöfnun launanna óuppfyllt, þótt það hafi átt að gerast á 6-10 árum. Þvert á móti hafi kennarar dregist aftur úr öðrum stéttum í landinu í launum. Kennarafélagið segir verulega ámælisvert að ákvæði gerðra samninga sé virt að vettugi og skorar á hið opinbera að standa við gerða samninga.
Samningar framhaldsskólakennara hafa verið lausir síðan í lok mars. Kennarafélagið krefst þess að grunnlaun verði hækkuð til að rétta stöðuna og segir að sú aðferðafræði að horfa á heildarlaun gefi ranga mynd af stöðunni.
Kennarafélagið lýsir því yfir stuðningi við samninganefnd Kennarasambands Íslands í yfirstandandi kjaraviðræðum sem það væntir að verða árangursríka og skili samningum sem hægt sé að treysta á að staðið verði við.
