Klæðningu vegarins til Borgarfjarðar flýtt

Malarvegum á Fljótsdalshéraði mun fækka til muna með fjármagni til flýtiframkvæmda í Vegagerð á næstu tveimur árum. Lokið verður við að klæða veginn um Fell og til Borgarfjarðar.

Þetta kemur fram þegar farið er yfir sundurliðun á fjármagni sem samgönguráðherra hefur veitt til flýtingu samgöngubóta, en fjárveitingin er hluti af áætlun ríkisstjórnarinnar umviðspyrnu vegna Covid-19 faraldursins.

Eitt stærsta verkefnið er klæðning á kaflanum frá Eiðum og að bænum Laufási í Hjaltastaðaþinghá. Í samgönguáætlun, sem lögð var fram í haust, var gert ráð fyrir að framkvæmdir við kaflann hæfust ekki fyrr en árið 2024.

Nú hefur verið veitt 30 milljónum til hönnunar verksins. Í bókun frá fundargerð bæjarráðs Fljótsdalshéraðs með fulltrúum Borgarfjarðarhrepps og Vegagerðarinnar kemur fram að gert sé ráð fyrir fjármagni til framkvæmda á árunum 2022. Vonast er til að hægt verði að bjóða vegagerðina út í síðasta lagi í apríl/maí á næsta ári.

Milljarði er veitt til að klæða tengivegi í ár og 1,5 milljarði á næsta ári, til viðbótar við fyrri áætlanir. Af heildarúthlutuninni koma þó ekki nema tæp 10% í hlut Austurlands. Þetta fé nýtist þó meðal annars í að klára að klæða veginn um Fell.

Í ár eru settar 20 milljónir í að klæða veginn frá Teigabóli að Bolalæk og á næsta ári eru 200 milljónir ætlaðar í endurgerð vegarins um Ásklif. Þá stendur einnig til að klæða milli Arnórsstaða og Hákonarstaða á Jökuldal í ár, það kostar alls 70 milljónir sem dreifast nánast jafnt milli ára.

110 milljónum er veitt í veginn frá Hofsá að bænum Öxl í sunnanverðum Vopnafirði. Þá fara 20 milljónir í að klæða við bæinn Ós í Breiðdal. Bæði verkin stendur til að vinna í ár.

Tvö önnur verkefni á Austurlandi er að finna í yfirliti Vegagerðarinnar. Fimmtán milljónir kostar að breikka brúna yfir Gilsá sem skilur að Velli og Skriðdal og 61 milljón fer í stálþil við höfnina á Djúpavogi.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.