Kviknaði í einbýlishúsi á Seyðisfirði
Mikill eldur kom upp í einbýlishúsi á Seyðisfirði á sjötta tímanum í kvöld. Talið er að húsið hafi verið mannlaust þegar eldurinn kom upp, það hefur þó ekki verið staðfest. Slökkvilið var búið að ná tökum á eldinum fyrir klukkan sjö.Tilkynning barst um eldinn um klukkan hálf sex í dag. Þegar voru kallaðir til viðbragðsaðilar frá Seyðisfirði og Egilsstöðum. Húsið var alelda er þeir komu á staðinn.
Samkvæmt upplýsingum frá lögreglu er talið að húsið hafi verið mannlaust, þó það hafi ekki verið endanlega sannreynt.
Húsið er tvílyft timburhús með steyptum kjallara og þurftu slökkviliðsmenn að berjast við eld á báðum hæðum. Um klukkan hálf sjö var búið að ná tökum á eldinum. Verst gekk að eiga við eld í þaki hússins og öruggt að þyrfti að rjúfa það.
Húsið stendur við Hafnargötu, gegnt fiskvinnslunni og er þekkt sem Litla-Wathneshús, byggt árið 1893 og kennt við Otto Wathne sem bjó þar um tíma. Ljóst er að það er mjög illa farið. Nærliggjandi hús voru rýmd í öryggisskyni. Hinu megin götunnar stendur fiskvinnsla Síldarvinnslunnar og bæjarskrifstofurnar fyrir innan það.
