Kynna matsáætlun sína vegna vindorkuvers í Fljótsdalshreppi
Fyrirtækið Fjarðarorka, sem áformar að reisa 350 megavatta vindorkuver á Fljótsdalsheiði í því skyni að afla orku fyrir rafeldsneytisverksmiðju á Reyðarfirði, hefur lagt fram til umsagna matsáætlun sína vegna verkefnisins.
Matsáætlunin er fyrsta formlega skrefið í umhverfismatsferlinu en byggir einungis á fyrirliggjandi gögnum. Áætlunin er í grunninn kynning á framkvæmdinni og hvernig áformað er að standa að umhverfismatinu sjálfu í kjölfarið. Öllum er heimilt að koma fram með umsagnir eða athugasemdir við verkið eða vegna verksins á vef Skipulagsstofnunar næstu fjórar vikurnar.
Áætlunin er 40 síður enda verkefnið töluvert viðamikið og mun breyta ásýnd Fljótsdalsheiðar mikið til framtíðar.
Í skjalinu kemur og fram að Fjarðarorka muni kanna möguleika á að auka afl vindorkuversins í allt að 500 megavött þegar þar að kemur ef mögulegt verður. Gangi það eftir verður heildarfjöldi vindmylla á svæðunum rúmlega 70 talsins í heildina. Annar eins fjöldi vindmylla, 70 til 100 talsins, rís svo ekki ýkja langt frá í landi Klaustursels á Efri-Jökuldal á svipuðu tímaskeiði svo heildarfjöldi þeirra, gangi allar áætlanir eftir, verður að lágmarki 120 samtals.
Vindrannsóknir og vegagerð
Þurfa mun um 87 ferkílómetra svæði undir vindmyllurnar en hvar nákvæmlega á þeim fimm svæðum sem um ræðir þær verða settar niður fer eftir niðurstöðum rannsókna á veðri og vindum á hverju svæði fyrir sig.
Alls telst mönnum til að fimmtíu vindmyllur þurfi til að framleiða 350 megawött en hver og ein þeirra verður um 200 metrar á hæðina. Algengur líftími vindorkugarða er talinn kringum 25 ár án endurbóta en Fjarðarorka horfir til þess að tvöfalda þann líftíma með endurbótum eða endurnýjun að 25 árum liðnum.
Þörf verður á töluverðum vegaframkvæmdum þegar þar að kemur til að koma vindmyllunum á sinn stað en svæðin fimm eru ekki tengd vegakerfinu nema með slóðum í dag. Gera sérfræðingar Fjarðarorku ráð fyrir að hver og ein vindmylla kalli á tíu ferðir flutningabifreiða frá uppskipunarhöfn að framkvæmdasvæði auk þess sem reisa þarf stóran krana á hverju framkvæmdasvæði til að koma myllunum upp.
Fyrir sína hönd þarf Fljótsdalshreppur bæði að gera breytingar á aðalskipulagi svæðisins og vinna fyrir það deiliskipulag en sú vinna er þegar hafin að stórum hluta.
Meðfylgjandi mynd er gróft mat sérfræðinga COWI á líklegan sýnileika vindmyllanna þegar upp komnar. Þær verða mjög áberandi á öllum dökkbláum svæðum á kortinu. Skjáskot.
Forsíðumyndin sýnir hluta lítt snortinnar Fljótsdalsheiðarinnar með fjalladrottningu Austurlands í bakgrunni. Svæðið mun taka miklum breytingum með vindmylluverum bæði á heiðinni sjálfri en einnig öðrum slíku veri ekki ýkja langt fram sem skal rísa í landi Klaustursels á Efri-Jökuldal. Mynd Landvernd.
