Kynningarfundur um nýjan þjóðgarð
Nefnd sem vinnur að tillögum um þjóðgarð á miðhálendinu heldur opinn kynningarfund um verkefnið á Egilsstöðum í dag.Umhverfis- og auðlindaráðherra, skipaði nýverið þverpólitíska nefnd um stofnun þjóðgarðs á miðhálendinu. Í nefndinni eiga sæti fulltrúar allra þingflokka á Alþingi auk tveggja fulltrúa sveitarfélaga. Þá sitja fulltrúar frá umhverfis- og auðlindaráðuneytinu og forsætisráðuneytinu í nefndinni.
Verkefni nefndarinnar eru m.a. þau að skilgreina mörk þjóðgarðsins og setja fram áherslur um skiptingu landssvæða innan hans í verndarflokka, fjalla um hugsanlegar aðkomuleiðir og þjónustumiðstöðvar, svæðisskiptingu og rekstrarsvæði og greina tækifæri með stofnun þjóðgarðs á byggðaþróun og atvinnulíf.
Jafnframt er henni ætlað að gera tillögur að helstu áherslum í stjórnunar- og verndaráætlunum og atvinnustefnu fyrir þjóðgarðinn og lagafrumvarpi um þjóðgarðinn, þar sem m.a. er tekin afstaða til stjórnskipulags þjóðgarðsins.
Hugmyndir hafa verið uppi um að nýr þjóðgarður tæki yfir svæði núverandi Vatnajökulsþjóðgarðs.
Fundurinn verður á Hótel Héraði og stendur frá 15:35-16:35. Hann er öllum opinn og geta fundargestir borið þar upp spurningar.
