Leita til ýmissa sjóða varðandi sjóbaðsaðstöðu í Neskaupstað
Hópur fólks sem vill koma upp fyrsta flokks aðstöðu fyrir fólk sem áhuga hefur á að njóta gufubaðs, heitrar laugar og flottrar aðstöðu við sjóinn í Neskaupstað hefur undanfarið lagt inn umsóknir um styrk til verksins til ýmissra aðila. Þar á meðal til Uppbyggingarsjóðs Austurlands.
Það staðfestir arkitektinn Ólafía Zoëga, ein þeirra sem leiðir hópinn sem telur fleiri hundruð manns á þessu stigi.
Þau vilja gjarnan nýta lóð eina í bænum undir kósí aðstöðu við sjávarmál sem nýst gæti stórum hópi bæjarbúa hvort sem er til samveru í sánabaði, heitum potti ellegar sem samastaður fyrir þá sem leita sér afþreyingar á sjónum útifyrir bænum. Hópurinn kynnir hugmyndir sínar á Facebook undir nafninu Baðstofan í Kvíabólsfjöru.
Sá hópur var stofnaður 2021 en töluverður áhugi er til að mynda á sjósundi og sjóböðum meðal margra í Neskaupstað. Slíkur staður myndi einnig vel gagnast öðrum aðilum eins og kajakræðurum sem og öðrum bæjarbúum sem njóta vilja nálægðar við sæinn undir góðu yfirlæti. Bæjaryfirvöld í Fjarðabyggð hafa þegar samþykkt að lóðin verði nýtt undir baðstofu.
Fjallað var um hugmyndir hópsins í 39. tölublaði Austurgluggans í byrjun síðasta mánaðar en sjálf er Ólafía þeirrar skoðunar að jákvæð og uppbyggileg verkefni sem þetta fái sérstakt brautargengi með tilliti til mikilla áfalla sem dunið hafa yfir í bænum síðustu misserin. Slíkt verkefni kallist líka vel á sögu Neskaupstaðar en á tímabili voru hvorki fleiri né færri en 40 bryggjur í bænum þó þeirri sögu séu lítil skil gerð almennt.
Frumteikning Ólfíu sjálfrar af aðstöðunni. Þar yrði athvarf allra þeirra sem stunda sjóinn í afþreyingarskyni. Aðsend mynd
