Lögreglan skoðar líkamsárás á Fellablóti
Lögreglan hefur til skoðunar meinta líkamsárás á þorrablóti Fellamanna fyrir tíu dögum síðan. Fórnarlambið nefbrotnaði, fótbrotnaði og slasaðist í andliti.
Tveimur karlmönnum lenti saman inni á klósetti eftir borðhaldið. Átökum þeirra þar virtist lokið þegar árásarmaðurinn í málinu, sem er á þrítugsaldri, hrinti þeim eldri, sem er á fimmtugsaldri, af krafti niður stiga. Hann lét ekki þar við sitja heldur fylgdi á eftir með höggum.
Hjá lögreglu fengust þær upplýsingar í dag að málið væri til skoðunar en engar frekari upplýsingar yrðu veittar að svo stöddu.
Þorrablót í fjórðungnum, þar með talið þorrablót Fellamanna, munu að öðru leyti hafa farið einkar friðsamlega og vel fram.
