Línubátar frá Fáskrúðsfirði gera það gott
Línubátar frá Fáskrúðsfirði gera það gott þessa dagana. Afli Sandfells og Hafrafells nam samtals rúmum 380 tonnum í október og eru bátarnir í 1. og 2. sæti yfir aflahæstu línubáta landsins í þeim mánuði.Afli Sandfells var mjög góður í október eða 213 tonn og Hafrafellið kom með 167,5 tonn að landi.
Eins og við sögðum frá hér á Austurfrétt hefur afli Sandfells þar sem af er ári verið með eindæmum eða 2.000 tonn og fékk áhöfnin köku frá Loðnuvinnslunni sökum þessa.
Hafrafellið er ekki langt undan í aflabrögðum en áhöfnin þar um borð hefur landað 1.600 tonnum það sem af er ári og er verðmæti aflans 400 milljónir kr. Áhöfnin hefur því líka fengið köku.
Í umfjöllun á heimasíðu Loðnuvinnslunnar er haft eftir Andrés Péturssyni skipstjóra á Hafrafellinu að þessi góði árangur væri að þakka afbragðs áhöfn og að útgerðin væri flott eins og hann orðar það. „Maður gerir ekkert einn,“ segir Andrés.
Ennfremur kemur fram í máli skipstjórans að kakan hafi verið góð...“svo er alltaf gaman að fá viðurkenningu fyrir vel unnið starf,“ segir Andrés.
Mynd: Loðnuvinnslan.
