Lokið við að leggja ljósleiðara í austfirsku þéttbýli á næstu tveimur árum
Fulltrúar Múlaþings og Fjarðabyggðar voru meðal þeirra sem í gær skrifuðu undir samning við íslenska ríkið um styrki til að ljúka við ljósleiðaravæðingu landsins fyrir lok árs 2026. Stór hluti þeirra húsa sem enn eru án ljósleiðara eru í Fjarðabyggð.Háskóla-, iðnaðar-, og nýsköpunarráðherra, í samvinnu við innviðaráðherra, ákvað í sumar að flýta ljósleiðaravæðingu landsins um tvö ár. Áður átti að vera búið að tengja 80% lögheimila fyrir lok árs 2028 en nú á einfaldlega að ljúka við að tengja öll heimili landsins. Til þess leggur ríkið 340 milljónir í gegnum Fjarskiptasjóð.
Í mörgum tilfellum hafa minni og meðalstórir þéttbýlisstaðir setið eftir í ljósleiðaravæðingu landsins. Ljósleiðaravæðingin hófst á höfuðborgarsvæðinu á vegum einkaaðila sem séu sér hag í henni og breiddi síðan úr sér til stærri þéttbýlisstaða. Ríkið styrkti síðan ljósleiðaralagningu til sveita.
Rúm 20% ótengdra húsa í Fjarðabyggð
Fjarskiptastofa kannaði í vor áform fjarskiptafyrirtækja og annarra aðila um ljósleiðaratengingar í þéttbýli á næstu tveimur árum. Í ljós kom að 4.438 hús í 48 sveitarfélögum stóðu þá útaf. Langflest, eða 1.012, voru í Fjarðabyggð.
„Ljósleiðaravæðing í Fjarðabyggð er eitt stærsta verkefni í uppbyggingu innviða sveitarfélagsins á undanförnum árum og gegnir lykilhlutverki í því að tryggja örugga og hraða nettengingu fyrir heimili, fyrirtæki og þjónustu um allt svæðið. Þetta er okkur mikið kappsmál.
Með því að ljósleiðaravæða alla Fjarðabyggð á tveimur árum erum við að stíga mikilvægt skref inn í framtíðina gagnvart búsetukosti, atvinnuuppbyggingu og auknum lífsgæðum,“ segir Ragnar Sigurðsson, formaður bæjarráðs í tilkynningu.
Í öllum byggðarkjörnum Fjarðabyggðar vantar upp á tengingar þótt í ár sé verið að tengja á Fáskrúðsfirði, Eskifirði og í Neskaupstað. Flest þeirra húsa sem standa út af eru í Neskaupstað, 273 talsins, 250 á Reyðarfirði, 219 á Eskifirði og 131 á Fáskrúðsfirði. Á Stöðvarfirði eru það 88 hús og 51 á Breiðdalsvík en á þeim stöðum er ljósleiðaravæðingin á móti hlutfallslega styst komin. Ekki liggur fyrir í hvaða röð byggðakjarnarnir verða tengdir.
Ekkert heimili á Djúpavogi ljósleiðaratengt
Í Múlaþingi er eftir að tengja um 350 hús á Djúpavogi, Seyðisfiðri og Borgarfirði. Stærsta verkefnið verður á Djúpavogi þar sem ekkert heimili er ljósleiðaratengt. Um 30% heimila í Bakkagerði eru með tengingu og á Seyðisfirði hafa Míla og Austurljós verið að störfum.
Haddur Áslaugsson hjá HEF veitum sem er sveitarfélaginu til ráðgjafar, segir að framkvæmdaáætlun skýrist þegar samið hafi verið við verktaka. Sveitarfélögunum er í sjálfsvald sett hvort þau ganga sjálf í verkið eða semja við verktaka. Múlaþing og Fjarðabyggð auglýstu bæði eftir samstarfsaðilum í sumar og segir Haddur að viðtökurnar hafi verið góðar.
Fjarskiptasjóður leggur fram 80.000 krónur til að kosta jarðvinnu. Alls ná samningarnir sem gerðir voru í gær til 4.251 húss. Þar með standa tæplega 200 út af. Ýmsar ástæður geta verið fyrri því, til dæmis að íbúar hafni tengingu, enginn búi í húsinu eða það sé þegar með viðunandi tengingu. Það útilokar ekki að húsið geti síðar tengst ljósleiðara.
