Megnið af laxinum á breskan markað
Fyrstu löxunum frá eldi Laxa í Reyðarfirði var slátrað á Djúpavogi í lok nóvember. Mikil uppbygging hefur orðið hjá fyrirtækinu á skömmum tíma.Að því er fram kemur í frétt norska sjávarútvegsvefsins Undercurrent News er áætlað að slátra allt að 1670 tonnum í þessari fyrstu lotu í vetur.
Fyrstu 40 tonnin voru í lok nóvember flutt frá eldisstöðinni að Gripalda með nýjum brunnbát sem hlotið hefur nafnið Lady Ann Marie í endurbætt laxasláturhús Búlandstinds á Djúpavogi. Haft er eftir Gunnari Steini Gunnarssyni, yfirmanni matfiskaeldis, að megnið fari á markað í Bretlandi en norska fyrirtækið Seaborn annast söluna.
Í greininni er fjallað um að skilyrði til laxeldis á Íslandi séu almennt góð, þótt eldisfólk treysti alltaf á ákveðna lukku til að forðast pestir. Laxalús hefur ekki sést á Reyðarfirði og er það sagt tengjast náttúrulegum skilyrðum sem séu að mörgu leyti hagstæðari hérlendis en í Noregi eða Skotlandi. Gallinn sé hins vegar að í kaldari sjó vaxi fiskurinn hægar.
Þá er sagt frá því að Laxar stefni á að ráða nýjan framkvæmdastjóra í byrjun nýs árs. Núverandi framkvæmdastjóri Helgi Sigurðsson fer í aðra stöðu innan fyrirtækisins. Ráðningarstofa hefur séð um ferlið og meðal annars leitað fanga í bæði Noregi og Skotlandi.
Laxar hafa vaxið gríðarlega á stuttum tíma. Árið 2016 voru þar tveir starfsmenn, að því er fram kemur í frétt Undercurrent, en eru nú orðnir 38.
