Meirihlutaviðræður hefjast seinnipartinn í dag
Gauti Jóhannesson oddviti Sjálfstæðisflokksins í Múlaþingi segir að meirihlutaviðræður muni hefjast seinnipartinn í dag. Hann vildi hinsvegar ekki gefa upp að svo stöddu við hvaða flokk verður rætt fyrst.Eins og fram hefur komið í fréttum eru tveir augljósir kostir í boði fyrir Sjálfstæðisflokkinn hvað meirihlutann varðar í Múlaþingi, Austurlistinn eða Framsókn, svo framarlega sem stefnt er að tveggja flokka stjórn í sveitarfélaginu.
Gauti er annars að jafna sig eftir bílslys sem hann lenti í á sunnudag á veginum um Öxi. Hann segir að hann hafi sloppið ótrúlega vel miðað við aðstæður.
„Þetta gerðist við einbreiðu brúnna við ánna Hemru en þar skall ég á annan bíl,“ segir Gauti. „Þetta var það harður árekstur að hjólastellið að framan brotnaði undan og annað framdekkið á mínum bíl lenti fyrir aftan bílinn.“
Gauti segir að miðað við hve harður áreksturinn var sé magnað að hann hafi sloppið með skrámur og engin alvarleg meiðsl hafi orðið í árekstrinum.
Aðspurður hvort þetta sýni ekki nauðsyn þess að fækka einbreiðum brúm í fjórðungnum segir Gauti svo vera.
„Það er hneyksli hve margar einbreiðar brýr eru á Austurlandi og löngu kominn tími til að gera slurk í að fækka þeim,“ segir hann.
