Mennirnir á góðum batavegi
Mennirnir tveir sem misstu meðvitund um borð í Hoffellinu á Fáskrúðsfirði á dögunum eru báðir á góðum bartavegi. Sá sem lá lengur á gjörgæsludeildinni, er að koma niður á almenna deild á sjúkrahúsinu í dag.
Að sögn Kjartans Reynissonar útgerðarstjóra hjá Loðnuvinnslunni á Fáskrúðsfirði eru mennirnir sem misstu meðvitund um borð í Hoffellinu ótrúlega brattir og báðir komnir til fullrar meðvitundar. Ekkert bendir til þess á þessari stundu að mennirnir bíði varanlegan skaða af slysinu. Fyrst eftir slysið höfðu menn áhyggjur af að súrefnisleysið mundi valda heilaskaða en ekkert bendir til þess á þessari stundu að svo sé. Mennirnir voru strax og þeir vöknuðu, með fullri rænu og mundu allt sem gerst hafði, þangað til þeir liðu út af þarna í lestinni. ,,Samt tekur alltaf einhvern tíma fyrir þá að ná upp fyrri styrk, eftir svona meðvitundarleysi", segir Kjartan.
