Mest hlutfallsleg fækkun skemmtiferðaskipa og farþega til Seyðisfjarðar
Samkvæmt áætlun Ferðamálastofu mun áfram draga úr umferð skemmtiferðaskipa til Seyðisfjarðar á næsta ári eins og raunin hefur verið á yfirstandandi ári. Flest skip komu þangað í höfn 2023 eða 114 talsins en verða á næsta ári 89.
Ferðamálastofa hefur unnið greiningu á stöðu og horfum á umferð skemmtiferðaskipa til Íslands en þar litið sérstaklega til þeirra sex hafna landsins sem flest skip og eða farþega taka mót. Á Austurlandi er það aðeins Seyðisfjörður sem kemst á þann lista. Metárið 2023 nam hlutdeild Seyðisfjarðar í heildartekjum hafna af komum skemmtiferðaskipa 8 prósentum. Faxaflóahafnir, Akureyri og Ísafjörður töluvert fyrir ofan Seyðisfjörð.
Það segir þó aðeins hálfa sögu að miða við metárið 2023 því það ár tóku komur skemmtiferðaskipa til Seyðisfjarðar mikinn kipp frá árunum á undan. 2022 var fjöldi þeirra til dæmis aðeins 72 talsins sem þá var einnig metfjöldi. Einnig þarf að taka tillit til að greinarmunur er á fjölda skipa annars vegar og fjölda gesta sem með þeim kemur.
Hlutfallslega varð fækkunin mest á Seyðisfirði á yfirstandandi ári eins og sést á meðfylgjandi töflu. Þar sést að skipakomunum fækkaði þar um 15,8 prósent milli 2023 og 2024 eða mest allra hafnanna en farþegum þessara skipa fækkað einnig um 16,6 prósent. Aðeins á Ísafirði fækkaði farþegum hlutfallslega meira, um 27,6 prósent, en á móti kemur að farþegafjöldi þangað er þrefalt meiri en til Seyðisfjarðar kemur.
Ferðamálastofa setur varnagla við áætlanir fram í tímann með tilliti til aukinnar gjaldtöku ríkisins af komum þeirra frá og með næstu áramótum. Þegar hefur eitthvað borið á afbókunum skemmtiferðaskipa austur á land næstu tvö árin en óljóst hvort það tengist beint aukinni gjaldtöku.
