Mikilvægur áfangi: Hjúkrunarfræðingur ráðinn á Borgarfjörð
Hjúkrunarfræðingur hefur verið ráðinn til starfa á Borgarfjörð eystri á ný, en enginn hjúkrunarfræðingur hefur verið þar búsettur síðustu fjögur ár. Borgfirðingar segja um öryggismál að ræða að hafa fagmanneskju í firðinum til að sinna bráðatilvikum.
Síðustu ár hefur hjúkrunarfræðingur heimsótt staðinn aðra hverja viku en staða hjúkrunarfræðings í plássinu verið laus til umsóknar. Borgarfjörður var tekinn inn í verkefni Byggðastofnunar Brothættar byggðir á síðasta ári en eitt af þeim málefnum sem íbúar hafa lagt hvað mesta áherslu á í verkefninu er bætt heilbrigðisþjónusta.
Alda Marín Kristinsdóttir verkefnisstjóri Brothættra byggða á Austurlandi segir ráðninguna mikilvægan áfanga fyrir Borgfirðinga. „Við erum búin að vera í samtali og samstarfi við HSA undanfarna mánuði. Það byrjaði með því að við buðum þeim á fund hingað á Borgarfjörð í lok apríl þar sem að skortur á heilbrigðisþjónustu á Borgarfirði var ræddur með stjórn HSA og íbúum á Borgarfirði.
Niðurstaða fundarins voru ákveðnar tillögur um hvernig væri hægt að bæta þjónustuna, eða gera hana viðunandi væri réttara að segja. Þar efst á blaði var að auglýsa stöðu hjúkrunarfræðings. Það er mikilvægt að hafa aðgengi að heilbrigðisþjónustu í heimabyggð en ekki síst er þetta öryggismál þegar kemur að bráðaþjónustu.“
Guðjón Hauksson framkvæmdastjóri HSA segir afar ánægjulegt að tekist hafi að ráða í stöðuna. „Við bindum vonir við að þetta bæti heilbrigðisþjónustuna á svæðinu og svo gerir tæknin það líka að verkum að staðsetning okkar fagfólks skiptir minna máli, þessi hjúkrunarfræðingur getur þannig sinnt ákveðnum störfum fyrir stofnunina í heild. Fram að þessu höfum við ekki gert kröfu um búsetu okkar fagfólks en í þessu tilfelli er ákveðið öryggismál að hafa heilbrigðisstarfsmann í þorpinu, þar sem langt er í næsta þéttbýli.“
