Móðir eina nemanda Grunnskóla Mjóafjarðar kennir honum í vetur
„Hún fékk val um að fara í burtu í vetur en hún gat ekki hugsað sér það,“ segir Erna Ólafsdóttir frá Mjóafirði sem mun í vetur kenna dóttur sinni Jóhönnu Björgu Sævarsdóttur sem er að fara í níunda bekk, en hún verður eini nemandinn í Grunnskóla Mjóafjarðar annað árið í röð.
Nemendum á Mjóafirði hefur fækkað síðastliðin ár og er þetta annar veturinn í röð sem aðeins einn nemandi verður við skólann. Eftir að Mjóifjörður sameinaðist við Fjarðabyggð hefur skólinn þó verið rekinn í samstarfi við Nesskóla í Neskaupstað og nemendur að hluta til sótt nám þar.
„Við mæðgur vorum nokkuð mikið á Norðfirði síðastliðinn vetur og það verður líklega eitthvað svipað í ár. Það verður þó aðeins á haustönninni en við förum ekkert eftir áramót þegar heiðin lokast og það verður verra í sjóinn,“ segir Erna, en ferjubátur gengur á milli Norðfjarðar og Mjóafjarðar tvisvar í viku allan ársins hring.
Kennslan hefur gengið vel
Erna er ekki kennaramenntuð, en tók uppeldisbraut í framhaldsskóla á sínum tíma og svo áfanga í uppeldisfræði síðastliðin vetur. Hún segir kennsluna krefjandi.
„Jóhanna Björg er að fara í níunda bekk og ég kenndi henni einnig í fyrra. Hún er reyndar mitt sjöunda barn þannig að ég er kannski búin að setja mig inn í námsefnið nokkrum sinnum við eldhúsborðið heima, en það er þó á allt öðrum forsendum að gera það sem foreldri eða að þurfa að bera ábyrgð á innlögn í náminu. Þetta hefur þó bara komið ágætlega út, við vorum ánægðar með fyrirkomulagið og Nesskóli líka. Jóhanna Björg er góður námsmaður í grunninn þannig að þetta hefur ekki verið erfitt fyrir hana þannig að við erum heppnar með það.“
Erna segir Fjarðabyggð standa vel við bakið á þeim mæðgum. „Það er alltaf auglýsing um kennarastöðu hérna hjá okkur. Þegar ljóst var að Jóhanna Björg vildi ekki fara að heiman í skóla var það metið á þann veg, bæði að hálfu okkar foreldranna og skólayfirvalda að þetta fyrirkomulag yrði látið ganga upp, að hún þyrfti ekki að fara frá sínu lögheimili til þess að stunda nám í grunnskóla.“
Erna segir að þrátt fyrir að Jóhönnu Björgu gangi vel í náminu sé félagslegi þátturinn erfiður. „Það er það sem upp á vantar hjá okkur. Hin börnin okkar fóru öll að heiman í 10. bekk. Við erum ekkert farin að spá í það, þetta verður bara verkefni vetrarins og við ætlum ekki að hugsa lengur í bili.“
