Mótmæla uppsögnum sjúkraliða í Sundabúð
Fréttir • This email address is being protected from spambots. You need JavaScript enabled to view it. • Fyrst birt 17. júl 2012 23:34 • Uppfært 08. jan 2016 19:23
Austurlandsdeild Sjúkraliðafélags Íslands mótmælir harðlega boðuðum uppsögnum sjúkraliða á hjúkrunarheimilinu Sundabúð Vopnafirði og þeim breytingum á rekstrarfyrirkomulagi hjúkrunarheimilisins sem Heilbrigðisstofnun Austurlands boðar.
Þetta kemur fram í ályktun sem stjórnin sendi frá sér. Þar er skorað á Heilbrigðisstofnun Austurlands, Velferðarráðuneytið og sveitarstjórn Vopnafjarðarhrepps að koma málunum í lag sem allra fyrst „svo að íbúar á hjúkrunardeild Sundabúðar þurfi ekki enn einu sinni að búa við þau ótryggu búsetuskilyrði sem af þessu hlýst.
Að leggja niður hjúkrunardeildina í Sundabúð, bjóða einungis upp á heimahjúkrun í byggðarlaginu og flytja aðra burt, er algerlega óásættanlegt. Stjórn Austurlandsdeildar telur að með þessu sé verið að færa þjónustunstigið mörg ár aftur í tímann.“
