Nítján staðir á Austurlandi í forgang á næsta ári
Nítján staðir á Austurlandi eru meðal þeirra 140 sem eru á lista sem Umhverfis- og auðlindaráðuneytið lagði fram í morgun í drögum að áætlun um uppbyggingu innviða á ferðamannastöðum, um land allt, til verndar náttúru og menningarminjum.
Í samræmi við bráðabirgðaákvæði sem Alþingi samþykkti í vor er gert ráð fyrir að ráðist verði í úrbætur á þessum stöðum á næsta ári.
Á svæðunum er eystra er gert ráð fyrir einfaldari verkefnum svo sem göngupöllum, bílastæðum og bættri salernisaðstöðu. Einnig er stefnt að aukningu í landvörslu.
„Ljóst er að uppsöfnuð þörf fyrir bætta aðstöðu á fjölsóttum stöðum og aukna landvörslu er mikil og halda þarf áfram á sömu braut með verkefnaáætlunum til þriggja ára í senn eins og kveðið er á um í lögum um landsáætlun um uppbyggingu innviða til verndar náttúru og menningarsögulegum minjum,“ segir í tilkynningu umhverfisráðuneytisins.
Áætlunin er undanfari 12 ára stefnumarkandi langtímaáætlunar og þriggja ára verkefnaáætlunar um sama efni sem leggja á fyrir Alþingi í formi þingsályktunar á næsta ári. Hún er í samvinnu við forsætisráðuneytið, atvinnu- og nýsköpunarráðuneytið og Samband íslenskra sveitarfélaga eftir umsagnir fagstofnana.
Óskað er eftir umsögnum um drögin. Frestur til að senda þær til ráðuneytisins er til 2. nóvember. Alls eru 1200 verkefni á heildarlista ráðuneytisins. Get er ráð fyrir 1200 milljónum á ári næstu fimm árum í verkefni á fjárlögum auk þess sem ríkisstofnanir hafa fé í verkin svo samanlagt eiga að vera til framkvæmda um tveir milljarðar árlega.
Austfirsku verkefnin eru ýmist á forræði sveitarfélaga eða einstakra stofnana.
Álfaborg, Borgarfirði.
Álfkonusteinn, Vopnafirði
Blábjörg, Djúpavogshreppi
Dyrfjöll – Stórurð
Fardagafoss, Fljótsdalshéraði
Fjárborg í Mjóafirði
Folaldafoss á Öxi
Fossárdalur í Berufirði
Fólkvangur Neskaupstað
Galtastaðir fram, Hróarstungu
Helgustaðanáma, Fjarðabyggð
Hengifoss, Fljótsdal
Hólmanes, Fjarðabyggð
Laugavellir, Fljótsdalshéraði
Saxa – Stöðvarfirði
Skálanes, Seyðisfirði
Sómastaðir við Reyðarfjörð
Teigarhorn í Berufirði
Ysti-Rjúkandi á Jökuldal