Njáll Trausti skipar annað sæti Sjálfstæðisflokksins
Njáll Trausti Friðbertsson, þingmaður Sjálfstæðisflokksins í Norðausturkjördæmi, verður í öðru sæti á lista flokksins fyrir komandi þingkosningar. Kjörið var á kjördæmisþingi flokksins í Mývatnssveit í dag.Fjögur voru í framboði. Njáll Trausti fékk 72 atkvæði. Hann var áður oddviti flokksins í kjördæminu en tapaði því sæti fyrr í dag til Jens Garðars Helgasonar, núverandi aðstoðarframkvæmdastjóra Kaldvíkur.
Berglind Ósk Guðmundsdóttir, sem skipaði annað sætið í síðustu kosningum og komst á þing, fékk 67 atkvæði. Berglind Harpa Svavarsdóttir, oddviti flokksins í Múlaþingi og varaþingmaður og Valgerður Gunnarsdóttir, fyrrum varaþingmaður voru einnig í kjöri. Aðeins eru gefin upp úrslit fyrir tvo efstu í kjörinu um sætið. Alls greiddu þó 167 atkvæði.
Kosið er um fimm efstu sætin á listanum á kjördæmisþinginu í dag. Þeim sem ekki ná sæti í tiltekið sæti gefst tækifæri á að bjóða sig fram í það næsta.
Fyrir þingið í dag höfðu Almar Marinósson frá Þórshöfn, Kristinn Karl Brynjarsson frá Reyðarfiðri og Akureyringarnir Jón Þór Kristjánsson, Ketill Sigurður Jóelsson og Telma Ósk Þórhallsdóttir boðið sig fram í þriðja sætið.
