Oddsskarðsgöng: Stórfelld svik á gefnum loforðum
Bæði Framsóknar- og Sjálfstæðisfélag Fjarðabyggðar gagnrýna harðlega
framkomnar hugmyndir í samgönguáætlun um frestum Oddsskarðsganga til
áranna 2015-2018 í stað 2012 eins og nú gildandi áætlun gerir ráð fyrir.
Þetta kemur fram í nýlegum ályktununum félaganna. Sjálfstæðismenn segja „nóg komið af sviknum loforðum“ og ráðlegra sé fyrir þingmenn Norðausturkjördæmis „slíta skónum sínum annars staðar en í Fjarðabyggð í næstu kjördæmaviku“
„Endalausum loforðum og tímasetningum á upphafi framkvæmda hefur verið haldið fram af stjórnarþingmönnum og ráðherrum á fjölmennum fundum með íbúum, fyrirtækjum og bæjaryfirvöldum í Fjarðabyggð.“
Framsóknarmenn segja Norðfjarðargöng „algjöra forsendu“ fyrir eðlilegri íbúaþróun og þjónustusókn íbúa sveitarfélagsins og í raun Austfirðinga allra sem þurfi yfir hættulegan fjallveg til að sækja lífsnauðsynlega þjónustu.
„Ef af verður er um að ræða stórfelld svik á loforðum sem gefin voru af hálfu ríkisvaldsins í aðdraganda sameiningar sveitarfélaganna sem mynda Fjarðabyggð.“
