Önnur vél sótti farþega Play
Farþegar Play, sem eyddu Þorláksmessu á Egilsstöðum þar sem flugvél þeirra gat ekki lent í Keflavík nóttina áður, komust á áfangastað á fjórða tímanum í nótt.Um sólarhring áður hafði vél þeirra á leið frá Kanarí lent á Egilsstöðum. Vélinni var beint þangað eftir að hafa sveimað í einn og hálfan tíma yfir Keflavíkurflugvelli og ekki getað lent vegna óveðurs. Þegar komið var austur hafði áhöfnin lokið leyfilegum flugtíma.
Eftir því sem Austurfrétt kemst næst voru á sjöunda tug farþega í ferðinni. Þeim var komið fyrir á hótelum á Egilsstöðum.
Til stóð að senda áhöfn austur í gær með áætlunarflugi en það fór úr skorðum. Að lokum var lending sú að tóm vél fór frá Keflavík til Egilsstaða eftir farþegum. Hún var lent kortér í tvö í nótt og stoppaði í sléttan klukkutíma. Hún lenti síðan í Keflavík upp úr 3:30 í nótt.
Sú vél var á ferðinni í allan gærdag, fyrst til Lundúna, síðan til Madeira, töluvert á eftir áætlun á síðarnefnda staðinn enda áætlanir Play úr skorðum með eina vél flotans fasta á Egilsstöðum.
Vélin sem upphaflega kom frá Kanarí fór nokkrum mínútum fyrr í loftið frá Egilsstöðum.
Mynd: Benedikt V. Warén
