Örtröð hjá sýslumanni og opnunartími framlengdur
Ákveðið hefur verið að framlengja opnunartíma þriggja sýsluskrifstofa á Austurlandi til að bregðast við bæði eftirspurn og vondri veðurspá til að íbúar geti kosið utankjörfundar fyrir Alþingiskosningarnar á morgun.Sýsluskrifstofurnar á Egilsstöðum og Eskifirði verða opnar til klukkan 18:00 í dag en á Seyðisfirði til klukkan 16:00. Svavar Pálsson, sýslumaður, segir að verið sé að auka þjónustuna og bregðast við versnandi veðurspá frá og með kvöldinu sem kunni að raska ferðum á kjördag.
Starfsmenn sýslumannsembættisins hafa haft í nógu að snúast í dag. Klukkan 13:00 voru alls komin 1401 utankjörfundaratkvæði, þar af 298 í morgun. Til samanburðar kusu 346 utankjörfundar í gær og var það óvenju stór dagur.
Á Egilsstöðum hefur snjóað púðursnjó stanslaust síðan í morgun.
Biðraðir hafa myndast hjá sýslumanni í dag. Mynd: Aðsend
